Pjesa e Gjashtë
Anita Susuri: Në ndërkohë më tregutë edhe për arrestimin e nanës të jujë, edhe të vëllaut të vogël…
Remzije Limoni Januzi: Në ‘85-tën, nana shkon për vizitë te motra, shkon me grunë e Hasan Malës së bashku po ai nuk ka pasë pasaportë e ka marrë, e kanë bo fallco pasaportën edhe kanë shku atje. Ka nejtë ni muj ditë nana, edhe ajo s’ka nejtë ma shumë [gruaja e Hasan Malës], edhe jonë kthy. Kur u kthynë dikush i ka shpijunu, edhe e arrestojnë Rexhijën, nusën e Hasanit edhe vijnë nanën time e arrestojnë. E marrin niherë vëllaun në Gilan, tana arrestimi ka qenë i nanës pak mas dy ditëve. E vëllau niset për punë në mëngjes edhe para se me hi në fabrikë e presin ata te dera e fabrikës edhe e arrestojnë. E marrin e majnë po tri ditë vëllaun, edhe po, torturat ma çnjerëzore qysh e kanë rrehë vëllaun e madh, ashtu e njejta e kanë përdorë këta taktikën.
Ka qenë bile me Esat Brajshorin më duket ka thonë në dhomë, edhe po, tregojke vëllau para se me marrë, erdhke koha a din për me marrë në pytje, tha edhe më thojke, “Baca Sylë, baca Sylë”, se i ri ka qenë ai, “Baca Sylë, bonu i fortë! Bonu i fortë, asgjë, asgjë armikut mos i trego, i fortë”, s’di, s’di, “Qishtu ma bojke”, a din, ato rrëfimet e tina qysh ka tregu. E tha, “Më marrshin ata edhe torturat çnjerëzore, ajtësitë të durës, të ftyrës, kamëve, të gjitha”. E kur ardhshin ata në dhomë, Esati tha, i çkyjke ato çka kish, naj teshë naj maicë të brendshme edhe me ujë të ftoftë i vnojke fytyrës, durëve, kamëve, i shtritë. Nuk mujshe me nejtë ti as në kamë, sikur që e kom përjetu une vet. As une s’kom mujt me nejtë, as në krah të djathtë as në krah të majtë, po në kokërr të shpindës.
Eh qashtu kanë vazhdu, po tri ditë, e kanë marrë e kanë liru, po gjatë ardhjes së këtyre tri ditëve osht’ kontrollu shpija, edhe nusja e vëllaut tha, “Na s’e kemi ditë që e kanë marrë”, tha, “na mendumë që në punë ka shku, edhe une çutë e fëmija fjetë”. Bam bam bam {onomatope}, zakonisht këta kanë kërsitë shumë në derë, jo pak në zile edhe me pritë po i kanë mëshu me dorë shumë, edhe thashë, “Kush osht’?” A din, kur ka dalë, tha, a din, “policë”, tha, “E kemi urdhën për me ju kontrollu”. “Hini mrena”, edhe i thashë djalit që, “Mos u tut! Ata tjertë”, tha, “ma të vogël s’dishin, po i madhi pak ma i madh”, tha, “E më kontrollunë edhe shkunë ata, erdhën tjertë. Kur kanë ardhë këta tjertë më thirri ni kojshike të kusherive aty, më thotë, ‘Irfane’, ata tu më kontrollu, ‘Irfane mos dil jashtë se krejt zi u mushë rruga, me kerre, me policë, me…’ ata të UDB-së erdhën, këta policë janë konë, ata që erdhën civilë”, tha.
Sinani kryesisht, Dauti, ai i Bilinicës ka qenë… Haliti, Halit Haliti që e ka shëtitë vëllaun nëpër katund, vetëm për me thonë, “Qy, qy, na po e shëtitim Ximën”. Edhe tha, “A tutën”, tha, “këta fëmitë?” “Jo, s’tutën”, thashë, “Po de, s’tutni ju. Jo jo”. Tha, “Ma bojshin”. Edhe, “Ni tepih”, tha, “e kisha shtritë , dyfish e pata lonë”, tha, “se fëmive ja shtrova nji tepih tjetër, lujshin në qatë dhomë”, tha, “e ata ma të mirë e kishëm, e lash me ni dhomë tjetër. Edhe fotografitë”, tha, “unë nuk i kom pa që i ka lonë”, tha, “Syla i kish lonë fotografitë e Rexhepit edhe të Nuhiut, e i pa nër jorgan poshtë” “A p’i njeh këta?” Tha, “Po, këta p’e njoh” “Kush osht’ ky?” Thotë, “Dhandrri”. “Kush osht’, qysh e ka emrin?” Ata e dijshin po… “Rexhep Malaj e ka” “Po ky?” Thotë, “Jo nuk p’e njoh këta”.
Ato i murrën, fotografitë i kanë marrë të motrës, temën e kanë marrë, të mijat çka kanë gjetë, të motrës në Gjenevë, krejt. Edhe a din, krejt nja dy orë, “U ndajtën në krejt dhomat”, tha, “secili nëpër dhoma, edhe në kuzhinë, krejt t’i praptunë”, tha, “teshat krejt, krejt, krejt”, tha, “në tokë i qitën, krejt”. Tha, “Mu nuk më lanë qaty në qosh, ‘Mos livrit p’i ktuhit’, çka kanë gjetë tani ardhshin ‘A është kjo kjo, kush osht’ kjo?’ Edhe shkunë”, tha, “i murrën fotografitë”, tha, “i murrën ato shkunë. Të nesrit kanë ardhë përsëri, të njejtit kanë ardhë ata që kanë bo kontrollë, po ma pak policë, s’ka pasë sikur herën e dytë”, tha, “Herën e dytë, une”, tha, “s’i kom pa, po këto gratë që janë konë, kojshiket që kanë thonë, ‘Krejt policë u konë rruga me policë edhe me kerre. Çka paska ndodhë?’” A din, ata na kanë njoftë kojshia edhe në Gilan po… shumë, shumë kerre, shumë njerëz. Erdhën herën e dytë, tha, “E kontrollunë, kurgjo s’murrën edhe kur Sylën nuk e lëshunë mo më erdh”, tha, “kunati”, vëllau i jem i madhi thotë, “Irfan, hajde ti në Pogragjë”. “Se e murrën vesh që e kanë arrestu Sylën”, tha, “une shkova me fëmi atje”, tha, vëllaun e kanë liru po s’e ka ditë që ka shku kunata në Pogragjë, ka ardhë në shtëpi të vet, dera mshelë, drejtë e atje në Pogragjë.
“Kur vjen, kur e kemi çelë”, tha, “derën, çka me pa”, tha, “i ajtë, sikur kur të…” a din, “fryjnë me, me… ballon”, tha, “E durtë, e kamtë”, me ni taxi kish pas ardhë deri në Pogragjë, se s’ka pasë aty autobus në atë kohë vonë. E kur u dalë nana, nana tha, “Nona mo si nanë mo”, tha, “met, met, s’kishte asni fjalë, e kunata tana i murr me pinceta me krema të kështu… me do lakën”, tha, “ku ju ka ajë nëpër ftyrë, nëpër komë nëpër durë, qashtu e kalumë dy ditë”, tha, “në Pogragjë”. Edhe njo, s’e di sa s’ka qenë në punë, deri sa u shëru, “Jemi ardhë”, tha “në Gilan edhe nana na erdh”, tha, “ata kanë marrë vesh që u konë nana në Zvicërr, s’jesin as dy-tri javë kështu edhe erdhën policia”.
Kanë shku në Pogragjë, se kanë thonë, “Në Gilan osht’. Kanë ardhë në Gilan edhe, “Une dola qysh me i thonë, se ishte Syla”, tha, “në punë, qysh me i thonë une që ‘Oj nonë, policia po të thirrin’”, tha, “Oj nonë”, tha, “kanë ardhë policia edhe po thojnë, ‘A e ki vjehrrën aty?’” Edhe, “Ma boni, ‘Hajr i koftë oj bijë’”, edhe, “P’i thom une vishu trash, naj xhamper e noj, kështut, sado kudo plakë e… edhe sarginë ja dhash edhe do me të gjata, edhe i thashë, ‘A ki?’” Se do kule i ka pasë, dimija po pak ma pak kështu kule, “Une të mijat se nona s’ka bajtë kule, e une mas lufte henez mas”, thojke, “bile qysh i pasmi bajtë këto dimija qaq shumë metra”.
Edhe tha, “Ja dhashë”, tha, “kulet edhe pizhamat nër, e jelekin, xhamper, sarginë e madhe, edhe e murrën, shkoi”. Kryesisht e kanë pytë, me prekë s’e kanë prekë, me sha e kanë sha. Kryesisht e kanë pytë për Kadriun, për Hasanin, për Rexhinë qysh keni shku, kush ja u ka dhonë juve pasaportin?” “Po Rexhia?” “Po Rexhia, nuk e di, a ka pasë pasaportë unë nuk e di Rexhia” “Çka të ka thonë Kadriu? Ta ka dhonë ni porosi” Kryesisht këto. “Mos të ka dhonë ty diçka për rrugë?” Thotë, “Jo”. “Ku të kanë pritë? A të kanë pritë ty?” E krejt, thotë, “Jo s’më kanë pritë po më ka lonë autobusi qatje edhe rastësisht e kom pa motrën”, a din rastësisht, unë po thom s’di qysh ka thonë, “Qe e kom pa qatje çikën teme edhe më ka marrë”, a din këtu ka gabu po, a din, më mos ta lëndoj me siguri. Edhe e lirojnë. E kanë majtë prej mëngjesit deri në mramje vonë e kanë majtë.
Anita Susuri: Çfarë moshe atëhere ka qenë?
Remzije Limoni Januzi: Po… une fëmija ma i vogël kom qenë, po i ka pasë 60 e sa vjet, ose 80 e diçka mas luftës ka vdekë ajo. Menihere mas luftës ka vdek, 85 ose 86 ka vdekë, po 60 po i ka pasë. Se në ‘85-tën kur e kanë marrë, 60, po, po, 60 e diçka. A për Rexhijën kanë thonë që e kanë torturu shumë, shumë e kanë torturu, se sot ajo nuk ndëgjon, veshin ja kanë dëmtu {tregon me dorë kah veshi majtë}, edhe këta sidomos këta të Gilanit shumë, Sinani, Dauti, ka qenë edhe Isa Bunjaku profesor i kimisë, por tha, “Ai nuk më ka prekë”. “Çka me bo bre Rexhi, çka me bo?” Tha, “Veç se ma bojke qishtu. Ai”, tha, “nuk më ka prekë. Këta tjertë po”. E kanë rrehë, floktë ja kanë shkulë ni grujës e pashkollume, pa… shumë çudi! E kanë dënu ni vjet.
Edhe në qatë kohë ka qenë edhe Naimi në burg, kur e kanë çu në Lipjan ata, prej Mitrovicës e kanë çu në Lipjan. Edhe Pavilioni i të rijve ka qenë, edhe i femnave, edhe i mashkujve edhe i femnave, e kur ka dalë kjo në oborr edhe e ka thirrë, “O Naim”, mos po ndëgjon Naimi, “O Naim, o Naim”, ka bërtitë, “Pse nanës nuk po ma kthen fjalën?” E ni vjet i kanë majtë në burg, e atë djalin e vogël motra e ka kqyrë, e plaku, djali i saj i vogël, vajza e vet Fitorja e re ka qenë atë kohë, e kur u ra Rexhepi në ‘84-tën Fitorja ka qenë shtatë vjet, në klasën e parë. E tetë vjet i ka pasë Fitorja, Mumini i ka pasë nontë vjet, se ni vjet diferencë kanë me Fitorën. Kështu që, motra u kujdesë tana edhe për vizitë, edhe për inxhën Rexhi edhe plakun, knejna për fëmitë. Vet burrë, vet gru, se vjehrri u konë i moshumë edhe nuk ka mujtë me dalë kështu, dej në oborr po, ama jo kështu.
Anita Susuri: Dashtët me më tregu edhe për Rexhep Malën?
Remzije Limoni Januzi: Po, Rexhepi ka ardhë kohë pas kohe te na, se e ka pasë edhe rrethin e vet në Ferizaj edhe ni ditë bile vjen prej Prishtinës në Ferizaj edhe vjen te na. Kur vjen te na, une, Reshati s’u konë aty u konë në punë, edhe e pashë krejt teshat e shkyme, këpucët, teshat, a din të vjetra. Thashë, “Rexhep”, thashë, “pse”, thashë, “kështu?” A din se kushtet ekonomike shumë mirë jonë konë, se kanë punu, jonë konë shumë punëtorë edhe bile thojke, “Veç se çështja e kombit na preokupon edhe na dhemb shumë, se t’mos ish konë”, tha, “na ishmi të parët atje në Gilan”, se punëtorë jonë konë shumë të mëdhaj. Edhe tha, “Remzije”, tha, “e pashë bre shokun, u takova me ni shok, e i pashë”, tha, “teshat krejt të vjetra, të shkyme, këpucët e shkyme”, tha, “a mi gjonë”, tha, “ti niparë të Reshatit, këpucët?” “Po”, thashë, “qysh jo”, thashë, “patjetër”.
I veshi krejt teshat e Reshatit, e këpucët e… me çorapa me gjithë, krejt. Ato i la aty edhe ni kaçketë e harroi të vetën. Mejremi, “Kaçketën e Rexhepit, mise u vra Rexhepi ja kom dhonë Fitorës”, qatë, “mise u vra”, i thashë, “Fitore e ka harru Xhepa këtu edhe qe ty po ta jap, si kujtim”. E bile ni kohë ka qenë si pranverë kështu, isha aty teshat t’u i shtri edhe nuk e kom pa kah ka ardhë Rexhepi, edhe po ma bon: Paaa! {onomatope}. A din, kështu si me të frigu. Edhe une kur e kom kthy krytë, “U Rexhep”, e kur ka shku atje në shpi i ka thonë, edhe une kom qenë prezent, “Babë”, tha, “e kom tutë”, tha kështu, “Remzijën”, a din, thotë, “Jo bre babë se Remzija s’tutët”, thojke, “e tremë, a din, e ke tremë”, edhe na qeshshum (qeshë).
Rexhepi pastaj, aktiviteti i Rexhepit ka qenë… ai s’u nalë kurrë, nuk u nalë, edhe pse dul prej burgit, mixha jeme i tha, “Biro, rri pak pusho”, a din, “deri sa ta marrësh vetën prej burgut edhe rri pusho, pastaj”, tha, “lëviz”. Thotë, “Babë”, thotë, “une komëkryq me nejtë me ty, mu nuk më len pushteti kurrë. Unë”, tha, “e boj temën”, tha. Edhe e ka përkrahë baba i vet në çdo… për çkado… edhe material edhe armatim, edhe gjithçka. Shoktë e Rexhepit e kanë marrë prej axhës Mehmet, se Hasani ka pat shku tana në Zvicërr, u pat largu edhe axha Mehmet ka qenë mbështetës, krah i fortë i Rexhepit për gjithçka. Rexhepi kur jom shku unë në shpi e kom taku shumë herë me patika në dhomë, që osht’ i gatshëm për me, me… mos me i ra mo në dorë këtynve, “Unë”, thotë, “në dorë mo nuk ju bi”. E përpara dyrëve, se ni rrugë e kanë si të gjatë, tana dyrtë i kanë {përshkruan me duar dy rrugë}, e nifarë fushe osht’ para aty afër edhe kerri i UDB-së civil ka nejtë rregullisht atje. I çojke burri i motrës shumë here vajzat e vëllaut të vet për me ble diçka, “Kqyre a osht’ ai kerri atje”, ose motrën, “Po”, a din, “atje ish”, axhat ose motrat a din, “Po, Rexhep, atje ish”.
Edhe tana në Ferizaj në qatë kohë, në qatë periudhë kur e kërkojshin Rexhepin, kerri i UDB-së ka nejtë, e kanë vrejtë edhe familja e burrit që ni kerr rregullisht po rrin. Po na patëm dalë ma thellë edhe nuk e kanë ditë që na s’banojna aty, kanë mendu që atje banojmë edhe mos po hin Rexhepi ose po del. Në ndërkohë edhe ka tregu që gjatë kërkimit të Rexhepit, se mo nuk ju ra në dorë mo, ai kaloi në ilegalitet, e vjen ni i UDB-së në shtëpi vetëm sa e kanë qitë plloqën e dytë edhe hypë përmi plloqë edhe ka mendu mos p’e sheh Rexhepin nëpër oborr ose diçka. Edhe e vërenë ai vjehrri thotë, “Çka ke hypë ti këtu?” Emri s’më kujtohët, thotë, “Qe hoxhë jom ardhë”, tha, “me kqyrë planin”, thotë, “Jo bre, çfarë plani ti po kqyrë? Plani, planin kishe mujtë ti kudo me kqyrë, plane ka lloj-lloj”, tha, “Jo, po mu më ka pëlqy qikjo”.
S’ka qenë qëllimi se kerri nejke atje edhe tana edhe te vjehrri erdhën edhe nja dy persona, qatë kohë une bash nuk folsha gati se hiç me këta vjehrritë, ni përshëndetje krejt, pak. Edhe vjen ai vjehrri i thotë çikës të kunatës, “Boni nja dy kafe”, i kishin pasë ardhë punëtorët e Sigurimit. “Kush po të vjen ty këtu?” Edhe ajo e re në klasën e parë u konë ajo Fitorja edhe thashë, “Magbule, hajt se une po i boj kafet, kumeditë kush osht’, edhe a din palidhje po më vjen”, une këtu isha. Edhe une ja çova deri te dera aty, hini gruja Magbulja edhe po i thotë, “Kafet i pruna”, une erdha kha, kur erdh ai ish prishë në qehre krejt vjehrri. Ndërkohë, Reshati erdh prej punës. Tha, “Reshat”, tha, “kanë ardhë”, tha, “dy civilë, p’e kërkojnë Rexhepin. M’i tregu Rexhepit që kështu-kështu osht’ puna”, edhe kanë pytë, “Ku vjen? Kur vjen çka bon? Çka…” Edhe mo prej atëherit mo Rexhepi nuk ka ardhë, se ka ardhë shumë shpesh. E kalon në ilegalitet.
E kisha une vetëm djalin e parë të madhin, në të dytin isha shtatëzanë. Edhe tash motra e ka ditë që osht’ ende në Kosovë, po ai ka tentu për me dalë, edhe tash kur takohna une me to edhe më vjen tash vajza e Kadri Osmanit në shtëpi, unë qatë natë e pashë në andërr m’u paraftyru andrra Rexhepin e pashë si me tesha të ushtrisë i veshun edhe vëllaun e vogël. Edhe qit andërr isha në mëngjes t’u ia tregu Reshatit kur p’e shoh ni si, si femën tak tak {onomatope} në derë, thashë, “U, a e nive?” “Po”, thashë, “Reshat”, ishte Hidajete Osmani edhe hajde hijmë, “Çka ka të re?” Menihere për Rexhepin diçka, se Kadri Osmani ka vepru me Rexhepin, edhe në ilegalitet ka qenë në qatë kohë me Rexhepin. Ajo hini mrena edhe po tregon, tha “Remzije”, tha, “Reshat”, tha, “ka kërku Rexhepi m’u taku me Remzijën”, edhe nërsy a din saj u desht me i thonë po ose jo.
Edhe thashë, “M’u taku në Prishtinë”, në cilën ditë, krejtë çka… edhe Reshati tha, une p’e kqyri Reshatin edhe tha, “Çka po më kqyrë?” Tha, “Po, dil”. Dalsha [unë] edhe pa konfirmimin e tina, se kisha fëminë, isha shtatëzanë në mujë të shtatë isha. Edhe tha, “Po”, tha, “çkado që ndodhë me to”, tha, “Remzi”, nërsy të Hidajetës tha, “çkado që ndodhë, po edhe në t’u zonsh në burg e di pse je shku”, tha, “Une djalin e çoj në çerdhe për këta që e ki, çka me bo jeta osht’ qashtu, jeta osht’ luftë”, po, “Luftë na deri sa ta kena lirinë kështu kena me me u ballafaqu”, edhe tha, “Duhësh me shku, po. Në qoftë se vritesh e di pse je vra”. Edhe e lam takimin në cilën ditë edhe une…
Ka qenë dimën, ka qenë dhjetori, ka mesi i dhjetorit, shumë i ashpër u konë dimri. Te konviktet a dikun t’u dalë une prej Gilanit, une shkova në Gilan masanej, edhe i thashë që, “Po du m’u taku, më ka kërku Rexhepi me u taku”, edhe bile axha met, si ka qenë ashtu afër ulun, u çu, edhe po më thotë, “Ku ki m’u taku? Këtu koka a?” Thashë, “Këtu, këtu osht’ axha Mehmet”, thashë, “në Prishtinë”. E une u takova me Rexhepin edhe shkova te familja e Hidajetës atje, edhe vëllau ma dha djalin e Kadri Osmanit ma dha me shku me u taku te… ku osht’ parku, te pishat, te… ku jonë varrezat po poshtë pishat ku jonë skejve, në rrugën nuk e di qysh i thojnë ata, Parku i Lirisë, a si i thojna, nuk e di bash mirë.
Anita Susuri: Në Taukbahçe dikun apo knej në qytet?
Remzije Limoni Januzi: Jo, te teatri mbrapa teatrit edhe shkon rrugës për Gërmi edhe jonë pishat atje, në qatë rrugë na jena taku. Edhe kur më sheh mu Rexhepi më kapë për krahi, “Hiç mos u tut”, se me rrëshqitë a diçka, tha, “mos u tut Remzi se nuk rrëshqet të mbaj une”. Se e patën kontrollu gjatë asaj kohe kur kaloi në ilegalitet Rexhepi, ja kontrollunë shpinë, ja lavrunë krejt, krejt oborrin ja lavrunë edhe ja gjetën njo dy bure me armë atje. Se ai mo vendosën që, “Vetëm gryka e pushkës këtu po i qartëson hesapet me armikun, përndryshe s’ka tjetër dalje”, kjo osht’ moment i fundit. Edhe i kanë gjetë ato armtë, po edhe e kanë marrë axhin Mehmet në pytje, kanë shku njerztë, “Jo”, thotë axha, “s’muj me ardhë”, thotë, “Duhësh me ardhë”, edhe taj i ka thonë njoni, “Leje, leje”, qashtu e kanë lonë përjashta në borë, tu e kontrollu shpijën përmrena, jashtë, ja gjetën armët. Ky dy-tri orë ka nejtë jashtë në pizhama, se në mëngjes kanë shku ata herët.
Zakonisht herët, zakonisht i kanë gjetë në gjumë kur mun me gjetë ma lehtë a din… në gjumë, m’i kontrollu ma lehtë e… edhe tash edhe ai, inati pak e krejt ato… edhe po më thotë Rexhepi, thotë, “Si është baba? A u mërzitët për ato armtë?” Thashë, “Po valla, inati i erdh”. “Thuj”, tha, “babës hiç të mos mërzitet që cikrrima jonë ato, ato armë jonë… kurgjo s’jonë, shumë cikërrima jonë ato. Po Fitorja?” Thashë, “Fitorja”, thashë, “po Fitorja mirë osht’” “Hanifja?” Tha, “Po më vjen keq për Hanifën, unë”, tha, “kurrë nuk i kisha dashtë me dalë jashtë, unë do të dalë jashtë, po luftën une e kom nisë në Kosovë, lufta ka me mbaru në Kosovë. Unë do të dal jashtë por jam përsëri mrena”, a din, “shumë shpejtë kom me u kthy mrena”.
E tha, “Hanifës i thu që nëse vritna”, tha, “ajo le të shkon në Shqipni, se kom frikë”, tha, “që ma marrin e ma malltretojnë. Po në qoftë se une dal jashtë, ajo e ka kerrin vjen jashtë. Po i thu që Rexhepi nuk rrin jashtë, une jom në Kosovë përsëri”. Thashë, “Rexhep, ti mos e baj gajlën e Hanifës edhe Fitorës hiç fare, ato janë atje. Kanë axhën Mehmet, jetojnë në shpi. S’jonë në shpi të hujë, kushtet i kanë të mira”, se të mira i kanë pasë gjithëherë. Edhe mu më tha, “Më vjen keq Remzi që s’jom konë”, se ja ka marrë flokët Qëndrimit, “që s’jom konë”, a din, “me i pru diçka dhuratë Qëndrimit”. Thashë, “Jo, Rexhep”, m’i dha njiqind franga djalit me i ble diçka, marka në atë kohë. Thashë, “Ja, këto pare ty të vyjnë, ty të vyjnë se ki nevojë ti për pare”, tha, “Këto”, tha, “une nuk i marr kurrë”, edhe ni laps Fitorës ja çoi.
Edhe, “Ti”, tha, “a ka mundësi ti me shku me kry ni punë?” Në Pogragjë, në katunin tem ka qenë nji i fshatit tonë në Gjermani që ka punu, po i ka pasë lidhjet me këta të lëvizjes [ilegale] jashtë: Hasanin e Halilin e këta Kadriun, e burrin e motrës Kadri Zekës. Edhe tha, “Ta jepin ni material e kanë çu ata prej atjehit”, thashë, “Po”, ose tha, “Hanifja”, “Jo, jo”, thashë, “Hanifja s’mun me përcjellë Hanifën, shumë ma lehtë e kanë me përcjellë ata e mu ma ndryshe”. “A shkon ti a?” “Po, patjetër që shkoj”, se une isha e sigurtë. “Ani”, tha, po tha, “kur të vish në Prishtinë takohesh me Nuhiun, del Nuhiu”, tha, “me marrë atë material, a e njeh?” Thashë, “Jo, nuk e njoh, se di”, thashë, “Une kur kom dalë prej burgit ka qenë Nuhiu me më vizitu me Aliun, djalin e vëllaut të Hasanit”, e thashë, “Me kaçketë me shallë e kom pa qashtu e njoh, e përndryshe kështu pa atë veshje”, a din, “pa kaçketën nuk e njoh”. “Jo”, tha, “qashtu del ai”. “Mirë”, u përshëndetëm.
Dhimbje po, në shpirtë m’u dhimbke, djalë i ri. Edhe u përshëndetëm, erdha une në Gilan, shkova në Pogragjë, e morra, u ktheva te motra përsëri. I tregoj axhës Mehmet që jom taku me Rexhepin, “Kështu-kështu, ju ka bo të fala. Të mos mërzitet baba, se ato jonë cikrrimë, më vjen keq që e kanë majtë e asi, po qishtu lufta e ka, këto i ka të këqijat lufta”. E për Hanifën… pastaj i thashë motrës kështu, ajo u mbajtë shumë mirë, gjithherë u mbajtë shumë mirë. Kurrë lot s’i kom pa, kurrë në jetë lot asaj s’i kom pa, “Çka më ndodhi, çka?” Ka qenë kështu e parapregaditun, e ka ditë që edhe martesa e saj nuk osht’ e lehtë, se e ka ditë që ka qenë në burg të ‘68-tës nja dy-tri here përpara edhe e ka ditë.
Ajo ka thonë, “Në qoftë se vetëm ni herë, me pasë pasë ni herë me ia pasë dhonë fjalën une Rexhepit që ni herë që, po edhe m’u vra Rexhepi mo kurrë mo tjetër mas atijna, kurrë s’isha, kurrë s’kisha marrë, nuk isha martu”. E bujta atë natë, e morra une atë letrën e çka kanë çu atë material edhe ni hartë. Erdha te motra, palltën e gjatë e kom pasë edhe në rreth të palltës e kom bo ata si fishek, jo e çeltë, ajo osht’, s’ka ti osht’ ilegale edhe… sekreti duhet të mbahët. Edhe e kepa, po e lash gjilponën aty në palltë e lash, e hartën e shtina në çantë, hartë thashë e Jugosllavisë edhe s’ka problem. Edhe jom dalë une në rrugën për Prishtinë, ka Gavrani ni lagje e re u pat ndërtu para ‘81-shit, e më kaloi autobusi, s’mujta nuk mujta me ecë.
Edhe thashë, çka të boj? Nuhia, mu më tha Rexhepi që del Nuhia të pret te spitali, çka boj une? Se në burg ka pasë ni vrasje ka ndodhë që e kanë pasë vra, ajo femna e ka kidnapu dikush i Pejës edhe jo me dashje, pa dashje, po ai u konë i martumë edhe këta e kanë kidnapu se njerëz të pa… edhe kjo masanej e ka vra në postë, edhe gjithmonë, a din, e kanë shti me zor në kerr, edhe si frikë, a din, prej kerreve pa e njoftë [me udhëtu me veturë të huaj], pa e ditë qysh me ja qitë dorën. Në atë kohë u konë pak e fshtirë ti Anita [i drejtohet intervistuesës]. Edhe u bo çka u bo, me çdo rrezik që e kom përpara unë kom me ia qitë dorën [autostop], Po i thom vetit, dikujt, i thom që më punon burri në gjygj, a din, më punon burri në gjygj, edhe shqiptartë i tutën pak gjygjit.
Tu kalu rrugës, a din, tu shku rrugës unë jom konë a din natyrën teme që kom pasë në klasë a din shumica djem, veç dy vajza, e s’e kom pasë problem me bisedu me mashkuj. Edhe më pytë, “Ku po shkon? A je e martume, ku je e martume, sa fëmi i ki, a punon?” “Jo”, thashë, “s’punoj”, se ai më tha që punon mësus. Thashë, “Në Prishtinë punon?” Tha, “Po”. “Udhëton?” Tha, “Po, çdo ditë po” “Uh, goxha”, e tha, “Ti a punon?” “Jo”, thashë, “s’punoj” “Burri ku punon?” “Në gjygj”. “Si e ka emnin?” Emnin thashë të mos ja ndryshoj se gjatë kohës me bo me më pytë edhe muj me dalë në rrenë. Thashë, “Reshat Januzi”. “Qe sa punon”, tha, “në gjygj?” Thashë, “Që dy vjet”. U mendu, tha, “Jo, nuk p’e njifsha”, “Qysh”, thashë, “ti me njoftë edhe mësus edhe në gjygj?” “Jo”, tha, “unë punoj në Sigurimin e Shtetit”. Ajaja{onomatope} a din kështu, pak më erdh e fshtirë shumë më erdh e fshtirë po e morra vetën edhe thashë mirë që më tregoi. Edhe thashë vet me veti kon e ki ti ktu edhe me kon po shkoj m’u taku…
E mirë, tanaj edhe mu më liroi edhe bisedë normale. Edhe thashë, “Këtu te spitali ma nalë”, thashë, “sa duhët?” Tha, “Jo, çfarë pagese”, “Po, ani”, thashë, “une edhe në autobus” “Jo, jo, jo”, tha, “Jo”, “Ditën e mirë!” “Ditën e mirë!” Qe Nuhiun po e shoh tu më pritë atje, se autobusi s’ka vonu pesë-gjashtë minuta, se autobusi ma ngadale kerri ma shpejtë edhe kur jom afru une aty thashë, “Nuhi, a je ti?” “Po, ti a je Remzi?” “Po”, thashë, “drejtë në spital”. Edhe jemi taku na te spitali jemi ulë, s’ka pasë asni person aty hiç. Edhe une tash p’e marr, tha, “A e ke kry ti punën?” “Po, po e kom kry punën”.
Po ja dhash une letrën edhe i thashë, “Po e kom rreth palltës” “Oh, shumë bukur e paske rregullu”, e kepa aty, e morra gjilponën e rregullova krejt palltën edhe p’i thom, “Nuhi”, thashë, “çfarë kontrollimi i kanë bo axhës Mehmet”, thashë, “s’mundësh në men me marrë”, thashë, “krejt ja kanë lavru tokën edhe ato armtë që i kan gjetë, që i ka majtë axha Mehmet”, qysh i kanë pre ato kuferat krejt me thikë, thashë, “S’kanë lonë me livritë prej venit hiç, as motrën, as atë kunatën as hiç”. E tha, “Hajt Remzi mos e ki dert”, tha, “se edhe krejt Kosova m’u kallë” tha, “une Rexhepin kurrë vet nuk e lo”. Edhe me të vërtetë nuk e la.
Edhe atë ditë që jom përshëndetë me Nuhiun që u ndajtëm (qanë) ka qenë shumë e fshtirë (qanë). Ata krejt kanë tentu me dalë jashtë, në malet e Sllovenisë. Këtë ngjarje Rexhepi ma ka tregu, tha, “Kem tentu me dalë jashtë se në malet e Sllovenisë kemi metë, borë e madhe pa hangër pa pi, pa… edhe e kemi marrë”, tha, “mes veti jemi përqafu për me u nxehë, edhe e kemi shkri borën me pi në vend të ujit”, tha, “edhe taman thojshmi, hajt dulëm në Austri”, tha, “përsëri na dilshmi në Slloveni”, edhe në qatë kohë ka qenë shumë e fshtirë me kalu se ka qenë kontrolla e jashtëzakonshme për Rexhepin.
Anita Susuri: Mas sa kohe pastaj u vra?
Remzije Limoni Januzi: Mas… në janar e kanë vra, une në nëntor jom taku. Atë në janar e kanë vra, po.
Anita Susuri: Qysh ka qenë për juve?
Remzije Limoni Januzi: Po… une më kujtohët në Ferizaj kom qenë, se gjithmonë me vesh në krah nejshe, a din, çka po ndodhë? Edhe lajmet e para i kish ndëgju ai kunati, vjehërria edhe kunati, edhe thojnë [në lajme], “Kanë bo vetëvrasje”. Rexhepi kurrë atë nuk e bon. Edhe vijnë te na, na s’i kemi lëshu lajmet e pesëve, se në 17:00 ora zakonisht, edhe ata e shofin që nuk po dijmë kurgjo edhe ata nuk na thanë kurgjo. Nejtën pak edhe u çunë. Kur i kom ndëgju une lajmet e 19:30-ve, atëhere… lajmi (qanë). Më duket që ky Mustafa [Muçaj] u konë, ka jepë, ka dhonë [lajmet]. Nuk di, nuk di çka të thom, çfarë përjetimi, çfarë… nuk di, nuk di, në shok [kom qenë].
Edhe jemi nisë, nuk kemi pasë kerr në atë kohë, në mëngjes herët. Në mëngjes herët në autobus, ai shoferi, vetëm une e Reshati jena konë në autobus. Ai shoferi na kqyrke, se lotët m’u më shkojshin s’mujsha me i nalë, s’mujsha. Kur jemi shku aty, axha Mehmet neve na dhojke forcë plaku, baba i Rexhepit. Edhe u grumbullunë njerztë plotë, plotë si e kanë ndëgju lajmin, se këtynve ja u kanë dhonë, rrymën ja u kanë nalë në shtëpi, rrymën. Edhe kanë shku dy UDB-ashë, edhe i kanë thonë, “Kem punë me axhën Mehmet. A bon me thirrë?” Bam bam {onomatope} aty e kërsitmja, këta edhe e kanë ditë që dikush prej UDB-së. Edhe kur kanë hi atë dite, para shkallëve i kanë thonë, “A p’e thirrë plakun?”
Edhe motrat tana, “Patën ardhë musafirë”, kështu zakonisht të familjes në katun. Edhe na s’kishmi çka me bo tjetër, shkova poshtë ni podrum e kanë pasë, po tri katëshe shpinë, edhe tha, “Shkova une poshtë me qitë ni diçka, ni kërlanë”, thotë, “të paktën”, a din. Edhe teshat i patëm la, tha, “Dola une me i shtri edhe inxhja po më nimon”, edhe tha, “qysh u nal?” A din, bisedën e rrymës. Kur hinën ata, kërsitën në derë edhe dul ni fëmi ia çeli derën aty, edhe po thojnë plakun me thirrë të UDB-së. “Hajde urdhëno!” “U vesh”, tha, “me këpucë baba për me shku”, se zakonisht këta të kanë thonë, “Hajde bre”, edhe ky, “Po, shkoi” “Jo, jo”, tha, “hiç mos dil”, tha, “se s’jena ardhë me të marrë”. Thotë, “Ku i ki djemtë?” Thotë, “Hasanin e dini ju që në Zvicërr osht’, Rexhepi ka shku për ni material të shpijës”, se patën fillu, ka pasë ni truall në Gavran, në lagjen e re edhe nuk e ka ndërtu.
Po ai e filloi si kamofllazhë atë temel, a din, që kishe po punoj diçka, se s’e lanë, nuk e lanë UDB-ja. “Ka shku për material të Zvicrrës”, a din, “të shpisë”, tha, “me marrë”, edhe kurgjo tjetër nuk tregunë. Pas ni ore, “Përsëri”, tha “erdhën”, tha, “përsëri baba u vesh e u ndreq, shkoi, këpuctë” “Jo, jo”, tha, “hiç mos dil”, thotë, “Une isha naltë teshat tu i… se na metën në gjystë edhe tu i shtri, edhe i thanë babës, “Mixha Mehmet”, tha, “djali të ka bo vetëvrasje”, ai s’e ka përdorë këta kurrë, edhe i ka thonë, “Jo bre bir”, thotë, “Rexhepi kurrë s’bon vetëvrasje. Une e njoh djalin tem, po e paskit vra”. Edhe i thotë, “Kuku inxhe e paskan vra Rexhepin”, edhe kjo, “Jo, jo, jo”, a din, për me ja hekë ata… “Jo, jo”, thotë, “E paskan vra se e niva une babës tu i thanë”. Edhe zbresin poshtë edhe ata shkojnë.
Rryma e nalt, e nalin rrymën me qëllim. Edhe baba tha, po na thotë, “Uluni këtu dyjat! Rexhepin na e paskan vra, të bohemi të fortë, lufta këto i ka. Deri këtu kemi ardhë që puna jonë deri këtu i ka dhonë frytet e veta edhe tash e tutje edhe ma shumë ka m’i dhonë, se çdo lule që shuhet lindin edhe shumë lule tjera”. “Edhe qaty e kom marrë vetën”, thotë motra, “O Zot, amë forcë!” Edhe lot nuk ka qitë, s’ka metë as gjysë ore me thonë, edhe u mushë plot, a din familjarë e kështu. Tani vëllau me nanën teme menihere si kanë ni qatë kohë kanë shku me ni rend qatë natë. Edhe kështu që tanë natën kanë nejtë çutë tu pritë.
Edhe të nesrit kanë shku motra me marrë kufomën, i kanë marrë dy batanije, çarshafë. Bile tha, njoni tha, “Cila osht’ për Rexhepin?” Thotë, “Une jom e martume”, tha, “Po, a keni fëmi, a ka lonë fëmi?” “Po ni vajzë” “Ai”, thotë, “u prek”, tha, “shumë”, edhe pak u largu kështu. “Për Nuhiun”, tha “Edhe na jena për Nuhiun, ke edhe po unë i morra”, tha, “krejt edhe për Nuhinë me mbulu edhe njoni polic po më thotë”. Tha, “‘Mos e mbulo se të bohët me gjak’”, thotë, “Jo, ky gjak osht’ gjak lirije. Unë do ta mbuloj” (qanë).