Pjesa e Parë
Anita Susuri: A mund të më tregoni diçka për fëmijërinë tuaj, çka ju kujtohet?
Sonja Artinoviq: Po kështu po filloj nga ajo se ku jam lindur. Unë jam lindur në qendër të Prishtinës, ajo, ajo rruga është quajtur rruga Goleshit. Atë kohë aty ka qenë kinemaja “Vllaznimi”, tash gjendet kinemaja “ABC”. Prindërit e mi aty e kanë fituar banesën, unë jam lindur. Përndryshe, prindërit e mi janë… a duhet të flas për këtë?
Anita Susuri: Po.
Sonja Artinoviq: Babain e kam nga Nishi, nënën nga Kragujevci, e babai me profesion ka qenë inxhinjer i topografisë. E ka përfunduar gjimnazin, pastaj akademinë ushtarake, topografinë dhe sipas dekretit ka ardhur në Prishtinë sepse, sepse nuk ka pasur të them, kuadër më të lartë. Dhe ka punuar në Zyren e Gjeodezisë për Krahinë. Nëna ka qenë amvise, pasi që babi ka qenë i lidhur me teren, ai e ka kaluar gjithë Kosovën, nuk e di sa mija herë. Kështu që, ajo ka qenë me neve në shtëpi. Unë e kam një vëlla më të madh, tri vite më i madh, ai me profesion është mjek, përndryshe fiziatër. Të dy e kemi përfunduar shkollën fillore “Aca Maroviq” këtu. Gjimnazin “Ivo Llolla Ribar”, ai e ka përfunduar Fakultetin e Mjeksisë, unë ekonominë.
Erëmirë Krasniqi: Të kthehemi pak tek Aca, “Aca Maroviq”. A është kjo në qendër të qytetit?
Sonja Artinoviq: “Aca Maroviq”. Po, kjo është në qendër, ajo është përballë, si quhet…
Erëmirë Krasniqi: Radios?
Sonja Artinoviq: Radios, bravo. Jo, televizioni është poshtë e radio ka qenë, ka qenë përballë. Dhe tash është ajo, tani nuk e di si quhet ajo shkollë…
Erëmirë Krasniqi: “Faik Konica”.
Sonja Artinoviq: Ashtu. Aty janë…
Erëmirë Krasniqi: Si ka qenë emri?
Sonja Artinoviq: “Aca Maroviq”, “Aca Maroviq”.
Anita Susuri: Si quhe…
Erëmirë Krasniqi: Jo si quhej, si e ka pas emrin lagjja?
Anita Susuri: Aha, si ka qenë ajo, si ka qenë ajo lagje, çfarë ka ndryshuar tani?
Sonja Artinoviq: Paj jo, jo shumë, jo, jo. Shkolla ka mbetur e njejtë përveç ngjyrës që e kanë ndryshuar, e njejtë ka qenë. Ai livadh, ajo mbrapa ka qenë. E tani mbrapa nuk kam shkuar të shikoj. Mbrapa ka qenë, oborri i shkollës, për basketboll, për futboll, ajo është…
Erëmirë Krasniqi: A mund të na flisni rreth fëmijërisë, në atë lagje?
Sonja Artinoviq: Kështu ka qenë, tani do të ju them. Ne kemi pasur një fëmijëri dhe rini të jashtëzakonshme. Në ndërtesën time kanë jetuar të gjitha kombësitë. Fqinji im i parë ka qenë xhaxhi Mustafa Hoxha, i cili ka qenë gjykatës i Gjykatës Supreme. Atëherë e kam pasur teta Mazllumen, do të thotë ata kanë qenë turq, bashkëshorti i saj ka punuar si moler dhe ka punuar në Obiliq. Xhaxhi Sami Pula ka qenë në atë kohë funkcioner, në kohën e Lidhjes Komuniste. Pra, ne aty i kemi pasur të gjitha kombësitë, ashtu kam lindur, që, që ta kemi fqi edhe shqiptarin, dhe mendoj ne nuk, unë aty në fillim nuk e kam ditur, kush është çka prej njerëzve, mendoj.
Sepse nuk kemi folur për këtë. Pastaj në rrugë, rruga ka qenë, unë mendoj që rrugë më të mirë nuk ka në këtë botë. Ku kemi jetuar si një familje. Aty kanë qenë Dalladaku, aty kanë qenë Shqepanoviqët, aty kanë qenë edhe romët, aty ka pasur gjithçka. Ka pasur goranë, apsolutisht gjithçka, dhe ne kemi jetuar aty. E gjithë rruga, jo ndërtesa ime, por rruga, këndej lartë {tregon drejtimin}, nga kinemaja e deri poshtë tek SUP-i. Poshtë ka qenë SUP-i. Aty, aty unë kam pasur shokë dhe shoqe ku do të thotë jemi lind në të njejtin vit dhe pastaj kemi shkuar bashkë në shkollë, edhe filloren edhe gjimnazin, bashkë jemi shoqëruar, bashkë kemi shëtitur.
Aty lart e kemi pasur korzon, aty e kemi pasur, kemi shkuar në kinema, kemi shkuar këtu {tregon drejtimin} te “Rinia” gjithashtu ka qenë kinema. Tani nuk e di si quhet, sepse {tregon drejtimin} kjo rruga që ka rrugica, ajo nuk ka qenë, aty ka pasur shtëpi të vogla. Ato shtëpitë a la turka.
Erëmirë Krasniqi: Nuk kanë qenë?
Sonja Artinoviq: Jo, jo, jo, jo aty jo. Kjo ndërtesa tani {tregon drejtimin} që është, ku është kjo, kjo e Ljubljanës, aty të gjitha kanë qenë shtëpi, të vogla dhe aty ka pasur ëmbëltore. Atëherë kemi shkuar në këtë ëmbëltoren {tregon drejtimin} ajo ende qëndron. Ndjej shumë kënaqësi kur shkoj aty, përballë Kino “Rinia”. Dhe kështu në drejtim të {lëviz dorën} Komunës, aty e shoh që ende ka mbetur shitorja e farave “Kikiriki”. Aty kemi blerë, aty ka qenë, ëmbëltorja e vjetër, njejtë mendoj që ëmbëltorja edhe sot është aty.
Kemi pasur jetë shumë të bukur. Nuk e di, tek ne të ndajnë, ajo çka flitet tani, ajo, ajo, nuk ka qenë. Ka qenë të shkojmë për Bajram, të vijnë për Pashkët, shqiptarët shumë kanë dashur që nëna ime t’i dekorojë vezët, po, shumë i kanë dashur. Pastaj, për Krishtlindje, ne ashtu, nëse diçka gatuajmë në shtëpi, ajo, ajo ndahet me të gjithë në ndërtesë. Megjithatë, nëna ime, e ndjera, ja, pasi që ajo ka vdekur e re, ajo shumë është kujdesur. Nëse ka yndyrë, ajo e dinë që shqiptarët nuk hanë, muslimanët nuk hanë, ajo thoshte, “Kjo ëmbëlsirë këtu ka yndyrë, kjo nuk ka, e tani, ti nëse do, {lëviz dorën} merre, e jotja është”.
Pastaj babai ka sjellë mjaft njerëz nga tereni, mendoj e kemi pasur një xhaxha Bedri, të cilin unë e kam adhuruar, andej diku nga Kaçaniku. Ai aq shumë ka dashur të vij tek ne, në, në vizitë. Ne kemi shkuar tek ai, ai thoshte, ai respekti që ai e ka përjetuar prej neve, sepse, babai im ka qenë intelektual në atë kohë ka qenë, thoshte, “Unë jam një fshatar i thjeshtë, ju mua më pritni, më përcjellni”, por ne nuk i kemi shikuar këto. Dhe unë po them, mua më vjen keq për këtë rininë sot, unë kurrë nuk do të doja të isha tani e re.
Erëmirë Krasniqi: Keni folur lidhur me shtëpitë a la Turka?
Sonja Artinoviq: Po, shtëpitë, ashtu, ashtu.
Erëmirë Krasniqi: Sa ka pasur të tilla në atë qytet, në Prishtinë?
Sonja Artinoviq: Po mjaft ka pasur, mjaft ka pasur. Ne edhe jemi shoqëruar, po, ne jemi shoqëruar me ta, pikërisht me turqit, ashtu, të cilët kanë jetuar në ato shtëpia, të cilët kanë pasur disa nanalle[1] speciale, të cilat unë i kam adhuruar, të drurit (qesh). Dhe me ato nanalle është hyrë në hamamet e tyre, banjot, të tilla nuk ka më. Unë mendoj që nuk ka. Dhe, ata, për shembull nuk kanë pasur parket, por kanë pasur njejtë ashtu nga druri {përshkruan me dorë} por atë dyshemen e drurit brodski pod[2], po them, të cilin e kanë fërkuar, me furçë. E verdhë, e verdhë si dukati ka qenë. Shumë njerëz të pastër dhe mua ajo Mazllumja ime, e cila edhe sot është aty, njejtë sikur të isha tek ata. Ajo ka mbetur të jetoj në atë banesë, kjo.
Dhe unë kam qenë me një shoqe, Tutën time, dhe Tuta më thotë mua, përndryshe Tuta u lind në Kroaci, në Zagreb por tani është këtu, është martuar. Dhe ajo thotë, “Unë nuk kam parë kaq dashuri”. Pas kaq vitesh të takoheni, dhe kaq shumë dashuri dhe përjetime të kujtimeve nga fëmijëria, sepse ajo më njeh si bebe, çka kemi si kemi, çfarë kemi bërë. Mendoj, aventurat tona dhe kështu, e ajo më ka mësuar mua të gatuaj edhe llokuma, dhe katmer piten dhe kollpiten, të gjitha këto m’i ka mësuar ajo mua. Nëna ime i mësonte diçka tjetër kështu që jemi shkëmbyer. Po them, si një familje.
Erëmirë Krasniqi: Sa ka, sa i madh ka qenë qyteti në atë kohë?
Anita Susuri: Sa ka qenë i madh qyteti atëherë?
Sonja Artinoviq: Po për besë ka qenë, ka qenë qytet. Tani saktë të ju them, ka qenë më i madh se Kragujevci për shembull, ai ka qenë diku të them kështu, Serbia ngushtë, ka qenë diku në vendin e pestë për nga madhësia. Beogradi, Novi Sadi, Nishi, pastaj nuk e di, ka qenë. Unë kur kam studiuar, kanë qenë njëmbëdhjetë mijë studentë.
Erëmirë Krasniqi: E ku ka filluar e ku ka mbaruar qyteti në atë kohë?
Sonja Artinoviq: Po, tani do të ju them. Për shembull, përfundonte, e kalon ja tani {tregon drejtimin} shkojmë këndej nga Podujeva. Ka qenë qytet, ka qenë prej asaj urës ku kalon {tregon drejtimin tjetër} nga Podujeva kur shkohet, deri aty ka qenë qyteti. Megjithatë ajo është… por në atë pjesë ka pasur shtëpi.
Erëmirë Krasniqi: E nga kjo anë?
Sonja Artinoviq: E nga kjo anë {tregon drejtimin} ka qenë deri te spitali.
Erëmirë Krasniqi: Aha, okej, e në atë kohë…
Sonja Artinoviq: E tani, jo, tani do të ju them kështu, kur unë kam qenë {vendos dorën te koka, mendohet} Grandi është ndërtuar kur kam, ne jemi gjenerata e parë e cila, po. Kur e kam festuar mbrëmjen e maturës, në vitin ‘78 unë e kam përfunduar gjimnazin dhe në vitin ‘78. Por aty më herët, kur kam qenë më e vogël, kur kam shkuar tek mësuesja, ajo periudhë, ka qenë një gropë e madhe, ne rrëshqisnim aty (qesh).
Erëmirë Krasniqi: (qesh) Okej, juve ju kujtohet ajo gropë, kur nuk ka qenë Grandi?
Sonja Artinoviq: Po, po, po, kur nuk ka qenë Grandi, dhe aty kanë qenë dyqanet të gjitha në rend, pastaj ato {lëviz dorën} janë rrënuar pastaj është bërë Grandi. E përballë Grandit, ku është, ku janë ato ndërtesat, ato janë ndërtesa të vjetra.
Erëmirë Krasniqi: A ju kujtohet ai bazeni?
Sonja Artinoviq: Si jo, ai ka qenë bazen ushtarak, po. Unë kam qenë e vogël, më kujtohet edhe ajo. E ne të gjithë, atëherë kemi qenë të mrekulluar, ne kemi qenë. Prishtina si Amerika, kemi bazen, nuk kanë qytetet nëpër Serbi (qesh), e ne kemi bazen. Edhe me të vërtetë ka qenë ashtu, Prishtina ka pasur diçka magjike në vete. Unë po flas, hajt unë u linda këtu dhe ndoshta unë jam subjektive. Sepse normalisht, mua, për Prishtinën më lidhin të gjitha gjërat më të bukura, edhe fëmijëria, edhe rinia, edhe dashuria e parë, edhe kur jam dashuruar për herë të parë, edhe martesa, edhe lindja e fëmijës së parë. Pra, çdo gjë që është e bukur unë, unë e kam të lidhur me Prishtinën.
Por, kur flas me njerëzit të cilët për shkak të punës, për shembull, njoh mjaft persona ushtarak pasi që vëllau im ka qenë edhe mjek ushtarak, kështu, ai ka punuar në kazermën ushtarake pastaj në vitet ‘90-të e ka fituar specializimin në Beograd, në VMA[3], atje ka shkuar dhe ai më nuk është kthyer. Që diku është normale, ka mbetur të punoj në VMA. Dhe tani shokët e tij dhe kështu po bisedojmë, njerëzit që kanë ardhur nga Kroacia, Sllovenia, nga Bosnja dhe kanë kaluar këtu, për shembull, një periudhë gjashtë, shtatë, deri në dhjetë vite. Të gjithë thonë se ato vitet që i kanë kaluar këtu, kurrë nuk do t’i harrojnë dhe kurrë më ashtu nuk do të kalojmë.
Erëmirë Krasniqi: Kur keni shkuar në bazen, a ka qenë ndonjë?
Sonja Artinoviq: Unë e kam pasur aty afër {tregon drejtimin} mblidheshim në rrugë.
Erëmirë Krasniqi: A keni shkuar çdo ditë apo për fundjavë?
Sonja Artinoviq: Çdo ditë, çfarë fundjave, ky ka {tregon drejtimin} qenë aty, mua prej rrugës vetëm një rrugë dhe unë jam te bazeni. Jo, aty kemi shkuar non stop.
Erëmirë Krasniqi: (qesh) E ndonjë traditë tjetër qytetare?
Sonja Artinoviq: Edhe diçka që ka pasur, në atë kohë, te ju tash nuk e di ku, i tregoj edhe fëmijëve të mi. Këtu është mbajtur sleti. Kjo ka qenë për ditëlindjen e Titos, më 25 maj. Ne në atë kohë nuk kemi pasur trenerka, këto nuk janë veshur, as nuk ka ekzistuar. Pastaj ne në stadionin e madh, aty kemi shkuar të ushtrojmë, për disa muaj, çdo ditë. Aty është dashur të jesh si nën fije të perit, të gjithë të ushtrojmë njejtë dhe kjo ka qenë për neve krenari e madhe. Të marrim pjesë në slet, që Tito kur të vij, që ne atij t’ia tregojmë atë, atë sletin.
Dhe unë krenohem që kam jetuar në kohën e Titos, unë vetëm kartelën e tij të antarësimit e kam, librezën e kam, asnjë tjetër. Apolitike jam, sepse kemi jetuar shumë bukur. Unë jam, Prishtina po them, ne kemi jetuar në mënyrë shumë kualitative, ne kemi pasur teatër, kemi pasur bende, ne kemi pasur gjithçka këtu. Ne kemi pasur artistë, nuk ka diçka që nuk e kemi pasur. Beograd i vogël. Ne as nuk kemi lakmuar të shkojmë në Beograd, sepse këtu kemi qenë të plotësuar me gjithçka. Kemi pasur diskoteka, kafiteritë e para.
Ne kemi pasur këtu kafiteri para se të ketë Kragujevci dhe Nishi. Sa i përket daljeve, për ne ka qenë kualitative ashtu si do të duhej të ishte jeta kulturore.
Erëmirë Krasniqi: E ku kanë qenë ato, me lokacion?
Sonja Artinoviq: Tani do të ju them, po, në “Bozhur” {tregon drejtimin} ka qenë diskoteka poshtë, e kur është hapur “Grandi”, atëherë njejtë ka qenë edhe në “Grand”, aty kemi, çdo njëri e kishte tavolinën e vet. Kafiteritë më së shumti kanë qenë, më të mirat, ku tani është Katedralja, dhe ajo pjesa {tregon drejtimin} ajo kthe, kthesë. Eh aty kanë qenë kafiteritë më të mira. Par exellence. Kanë qenë kafiteri vetëm ashtu, të parin e ka hapur një Sami dhe më kujtohet mjaft mirë. Kafiteri e mrekullueshme.
Erëmirë Krasniqi: Si quhej?
Sonja Artinoviq: Sami.
Erëmirë Krasniqi: E kafiteria?
Sonja Artinoviq: Aha kafiteria, e atë nuk e di por pronarin e di, Saminë. Dhe pastaj, ai e ka hapur i pari, pastaj edhe tri-katër kafiteri ashtu në rend. Dhe, ka pasur muzikë edhe në verandën e “Bozhurit”, ku tani është Swiss Diamond, në verandë, verës bëhej, jo verës po në atë periudhën prej prillit dhe ne kur ktheheshim nga gjimnazi, zakonisht kemi qëndruar aty, kemi dëgjuar muzikë. Ne kemi dalur vetëm gjatë vikendit, nuk ka qenë si tani. Do të thotë, ne kemi dalur të premten dhe të shtunën. Daljet kanë qenë deri në orën dhjetë. Kështu është…
Erëmirë Krasniqi: A keni, a ka pasur muzikë?
Sonja Artinoviq: Po, po, kemi pasur di-xhej[4] fenomenal, çfarë, ajo është, sepse ne jemi, ne jemi rritur me muzikë të huaj, me populloren, kjo tani “ojha”, nuk kemi pasur. Ne kemi dëgjuar Dire Straits, Eric Clapton, po mendoj Eagles-at, nuk e di, Bryan, nuk e di, nuk po më kujtohet. Kjo është e imja, {tregon kah vetja} muzika, e rinisë sime.
Anita Susuri: Ajo muzikë është dëgjuar?
Sonja Artinoviq: Po, po, po, Boney M, Gloria Gaynor, po nuk e di tash, Ray Charles por Eric Clapton disi…
Anita Susuri: A kanë shkuar të gjithë apo vetëm serbët?
Sonja Artinoviq: E po jo, jo, të gjithë. Ajo nuk, ajo nuk ka, më vonë ka filluar që nuk e di, nuk, nuk ka pasur ndarje. Ne kështu, si gjimnazistë kemi shkuar të gjithë, ashtu në Bozhur, është ditur ajo përgaditja. Gjithë javën jeton ti, ne ushtrojmë vallzimin që të jemi të gjithë të barabartë, të jetë ajo. Ajo nuk ka lidhje me këtë tani, unë po them ndoshta juve ju duket qesharake por për neve ka pasur shumë kuptim. Kemi pasur korzo shumë të bukur, aty ka pasur blinjë të bukur, dhe secila shoqëri e ka pasur drurin e vet. Dhe kur ti ke dashur ta gjesh dikë, ti saktë e ke ditur se ku do ta gjesh, te cili dru.
A tek {tregon në të djathtë} Varteksi[5], apo lartë {tregon drejt} te teatri sepse rruga ka qenë deri te Këshilli Ekzekutiv atëherë, tani e kanë shtruar, kurse atëherë ka qenë deri lartë. Dhe pastaj edhe nga njëra edhe nga tjetra anë, dhe aty çdo njëri e ka pasur… Unë kryesisht jam shoqëruar me njerëz, kështu, kështu e kam pasur gjeneratën, të cilët kanë luajtur basketboll për Prishtinën. Pastaj në fakultet kam shkuar në ato Ekonomiada, kur kanë shkuar të gjithë, jo të gjithë, prapë studentët e përzgjedhur nga e gjithë Jugosllavia.
Do të thotë aty është Zagrebi, aty është Rijeka, dhe Shkupi dhe ne mblidhemi në mbrëmje, Opatija ku kemi qëndruar nga dhjetë ditë, në lojëra, lojra sportive. Por ato shoqërimet, ato nuk kanë çmim {lëviz kokën}, ajo nuk ka çmim. Dhe unë tani nuk e di se çfarë do jepja nëse mund të kthehesha, vetëm njëherë të bëhet ashtu. Dhe mua më vjen keq që më nuk ka këso gjëra.
Erëmirë Krasniqi: Të kthehemi te gjimnazi, kur keni qenë në “Ivo Llolla Ribar”, si ka qenë ajo?
Sonja Artinoviq: Mrekullueshëm, mrekullueshëm.
Erëmirë Krasniqi: Çka ju kujtohet?
Sonja Artinoviq: Po më kujtohet, ne kemi, po them, ne nuk jemi shoqëruar vetëm me të klasës, por me gjeneratë. Ka qenë një klasë shqiptare, një turke, kështu që ne jemi shoqëruar normalisht, aty kurrë nuk ka pasur ndarje.
Anita Susuri: A dilnit së bashku në, në kafiteri?
Sonja Artinoviq: Po si jo, normalisht, bashkë rinim ulur, pinim, edhe pesë vite të maturës kur i kemi festuar, do të thotë nga përfundimi i gjimnazit. Do të thotë ne kemi festuar në Çagllavicë, ne kemi festuar së bashku. Ka ardhur Veton Surroi, kanë ardhur këta shokët e mi, kanë ardhur turqit. Do të thotë e gjithë kjo ka qenë për, e për dhjetë vite nuk ka qenë më. Por për pesë vite, do të thotë aq ka zgjatur. Këtë dua të them, në vitin ‘78 ne e kemi përfunduar, edhe pesë vite është viti ‘82, tre, ne kemi festuar së bashku. Kjo është…
Anita Susuri: Dhe pas kësaj?
Sonja Artinoviq: Pas kësaj, jo. Megjithatë ne jemi shoqëruar, unë edhe sot e kësaj dite, unë jam shoqëruar me Veton Kajtazin, i cili është më i vjetër se unë, ka luajtur basketboll, unë edhe sot e kësaj dite vi në Prishtinë, pijmë kafe, vi deri te Graçanica. Unë asnjë fije nuk e kam ndërprerë, Albani im, Betim Loshi, nëna e tij më ka dhënë gjeografi, nënën e ka pasur serbe, babain shqiptar. Ai ka qenë në shqip por jemi shoqëruar kur jemi parë para dhjetë vitesh në Nju Jork. Përndryshe, arkitekt. Edhe gruaja edhe ai. Ai nuk ka mundur të besoj, ai mua më ka sillur, ai është i gjatë, ai mua më ka sillur. Të gjithë në Graçanicë kanë shikuar, nuk kanë kuptuar asgjë.
Ne kemi qarë, ne kemi qeshur, ne kemi, ajo nuk mund të përshkruhet me fjalë. Ato emocione që ne i kemi, nuk kanë…
Erëmirë Krasniqi: E juve ju kujtohet si ka qenë qyteti, kur nuk ka pasur as Grand, as bibliotekë?
Sonja Artinoviq: Po, aty kanë qenë shtëpitë e vogla, nuk ka pasur as asfallt në rrugën time, nuk ka pasur asfallt. Ishin ato kubëzat, ato kalldërmat ka qenë. Sepse në atë mënyrë unë ju theja kokat fëmijëve, kush ma ngacmonte vëllaun, e nxjerrja një dhe ia thyeja kokën. Nuk kemi, nuk kanë qenë të gjitha ndërtesa në rrugën time. Ndërtesat e para kanë qenë te kinemaja njëra, pastaj ajo që e ngreh tjetra dhe këndej tri ndërtesa. Rruga e Goleshit, numër 7, 9 dhe kështu. Ishte një pjesë më e tërhequr. Tash aty ka, jo tash, edhe atëherë ka qenë një rrugicë që të shkohet atje.
Aty mbrapa kanë jetuar turqit, dhe Siqan, Shaip, tani ata janë në Londër, unë edhe sot e kësaj dite dëgjohem me ta. Dua të them, nuk kemi ndërprerë asgjë, normalisht me dikë po për shkak së nuk po shihemi, jo për arsye tjera, por thjesht, nuk po i sheh. E me disa, ja tani përmes këtyre rrjeteve sociale, po gjindemi disi.
Erëmirë Krasniqi: Si ka qenë… po mendoj, a ju kujtohet viti ‘81 kur gjërat pak…
Sonja Artinoviq: Po, si jo. Bash kam qenë studente dhe me Arsimin tim, unë kam qenë aktiviste e bashkësisë së parë lokale, kam qenë, sepse unë jam temperamente, kam pasur dëshirë të punoj gjithçka nga pak dhe kam qenë aktiviste. Kam qenë kryetare e rinisë e bashkësisë së parë lokal, atëherë më kanë propozuar të hyj në Lidhjen Komuniste. Unë nuk i kam pasur ato pretendime, prandaj nuk kam hyrë, por thjesht kam dashur të punoj me të rinjë dhe kështu.
Dhe pastaj normalisht ata më të vjetrit më kanë propozuar dhe kështu me 18 vjet jam bërë anëtare e Lidhjes Komuniste, kurse prej 16 vjet kam qenë aktiviste. Dhe aty ne i kemi mbajtur takimet, kështu, dhe çfarë më ke, kam shkuar tani në drejtim tjetër, më keni pyetur diçka…
Erëmirë Krasniqi: Për demonstratat.
Sonja Artinoviq: Po bëhej regjistrimi i popullsisë, më 1 prill të vitit ‘81. Dhe kështu ka qenë një serb, një shqiptar, femër apo mashkull nuk ka pasur rëndësi. Unë kam qenë me Arsimin, më kujtohet shumë mirë Arsimi. Dhe ne e kemi pasur normalisht aty qendrën, pikërisht në Aktash kemi qenë. E dini ku është Aktashi? Ashtu. Dhe ne kemi shkuar bashkë, dhe nuk e kemi ditur se çka po ndodh, kemi hyrë në banesë, kemi shkruar të gjitha çka kanë qenë të nevojshme. Kur kemi dalur ai mua më ka përqafuar kështu dhe më ka shtrënguar këtu, dhe më tha, “Sonja, mos u shqetëso unë do të përcjell deri në shtëpi”. Përse, sepse ne kur kemi dal në rrugë, këndej nga menza, nga konviktet ka filluar.
Ka qenë masë shumë e madhe e njerëzve. Aty unë, prej atëherë kam fobi, ja për shembull, të jem diku ku ka masa të mëdha. Thjesht ndjehem disi, unë nuk e kam kaluar keq, ai më ka përqafuar dhe më ka thënë, “Mos u shqetëso, unë të dërgoj në shtëpi”. Për mua rruga e Goleshit ka qenë aty afër. Por, vëllau im ka qenë në fakultet, kurse fakulteti i mjeksisë është te spitali, ajo është pak më larg. Babai ka qenë në teren, nëna ime ka qenë shumë e shqetësuar kur ka parë, ka qenë duke qarë, jashtë vetes kishte qenë, por kur mua, mua Arsimi deri te dera më ka sjellur. Kjo do të thotë, unë as që e kam ndjerë frikën, unë vetëm e kam parë masën.
Nuk e di çka po ndodh, nuk e di për çka o fjala, çka është, dhe ai më ka sjellur aty dhe më ka thënë mos u shqetëso, mos dil. Kurse unë i them, “Ku e kam vëllaun, unë dua të nisem deri te spitali”, kurse ai më thotë, “Të lutem mos shko se nuk dihet çfarë mund të ndodh”.
Erëmirë Krasniqi: A ka pasur polici?
Sonja Artinoviq: Pastaj ka pasur, por në fillim jo. Vëllau ka ardhur shumë më vonë, ka ardhur i shqyer, ndoshta për shkak asaj se si e ka ngrehur masa, me pantollona të grisura, ka ardhur me disa shokë, pasi që ne kemi jetuar në qendër më së lehti ka qenë të vihet tek ne, pastaj gjithkush të shkoj në shtëpi të vet. Por kjo ka zgjatur dhjetë ditë, aty kanë qenë edhe tenkat, aty ka pasur gjithçka, nuk kemi pasur as bukë ku të blejmë. Ka pasur snajperistë, pas ndërtesës sime kanë qenë dy solitera, ka pasur aty disa të shtëna. Dhe, nuk kemi guxuar të dalim, sepse gjatë ditës diçka pak, asgjë nuk ka funksionuar, në rrugën tonë kanë qenë disa njësi speciale.
Unë tani nuk e di, nuk më ka interesuar, por do të thotë se nuk ke guxuar të dalësh nga ndërtesa pas orës tetë. Kjo ka qenë. Kështu që unë gjatë jetës sime i kam përjetuar tri orë policore, jam e pasur [me tregime] sa i përket kësaj çështje (qesh). Pastaj edhe dy herë edhe me fëmijë, kështu, e kam përjetuar. Atëherë ajo ka qenë hera e parë. Kjo ka zgjatur për dhjetë ditë, pastaj është normalizuar.
Dhe ja unë për shembull pas kësaj, unë dhe Arsimi kemi pasur të punojmë në fshatin Orlloviq, ja. Pra pas gjithë atyre ngjarjeve, ai fshat është tek si t’ua shpjegoj, aty afër Prishtinës por është fshat. Që aty të shkojmë të punojmë. Unë nuk kam pasur, Arsimi më ka pyetur, “A ke frikë?” “Jo,” thashë, “pse?” Dua të them pse të kem frikë? Ne kemi hyrë në shtëpi të shqiptarëve, shtëpi të serbëve, ai ka qenë fshat i përzier.
Erëmirë Krasniqi: A ka pasur raportime lidhur me këtë? A keni pasur arsye të keni frikë?
Sonja Artinoviq: Po nuk e di, unë gjithmonë duhet të flas për familjen time duke pasur parasysh të mos bëhet klishe, jo. Kjo ka ndodhur, demonstratat kanë qenë, të studentëve, kanë qenë edhe në vitin ‘68 por atëherë unë kam qenë atëherë e vogël. Ka qenë njejtë kanë qenë disa trazira të studentëve. E në vitin ‘81, atëherë nuk ka pasur raportime sikur tani, të ngriten tensionet dhe nuk e di, demonstratat kanë qenë, janë qetësuar dhe po them kanë vazhduar kështu dhjetë ditë që ne nuk kemi funksionuar mirë. Por pas njëzet ditëve, gjithçka është kthyer në normale, unë pas një muaji prapë kam filluar me regjistrimin e popullsisë.
Dhe regjistrimi i popullsisë është bërë. Ja, po them me Arsimin kam qenë. Ai ka banuar diku në këtë rrugë, ajo ndërtesa e fundit. Ja, në këtë, atëherë është quajtur rruga e Beogradit. Ai ka jetuar aty, prapë kam qenë me të…
Anita Susuri: A ka ndryshuar diçka pas demonstratave, në shoqëri?
Sonja Artinoviq: Paj jo, jo, pas kësaj ne kemi shkuar prapë kemi udhëtuar, jo. Unë po them jam shoqëruar në fakultet, me Valdet Spahiun nga Peja. Atë e kam pasur si baba, basketbollisti kryesor i cili na ka kryesuar, jo, jo, jo. Blerim Vuniqi, tani të mos e numëroj atë ekipin e njerëzve që edhe sot e kësaj dite i takoj. Me të cilët jam që nga fëmijëria, jam rritur me ta. Kështu që, unë personalisht nuk kam pasur problem, nuk e di as në rrethin tim, prej shoqërisë sime. Unë vetëm e di që atëherë, njerëzit kanë filluar të shpërngulen, atëherë po. Që nga viti ‘81 fillimisht ka qenë në ‘74 një ekzodus, nuk e di pse njerëzit kanë qenë në vitin ‘74 por ‘81-tën ka pasur shpërngulje masive.
Dhe më kujtohet që na kanë pyetur, babai im ka thënë: “Jo unë, nuk e kam ndërmend të iki që këtu” sepse ai Prishtinën e ka përjetuar si qytet të lindjes, e jo Nishin. Ai e ka shtëpinë në Nish, kurrë nuk ka dashur të shkoj në Nish të jetoj. Ai Prishtinën e ka përjetuar si të tij…
Anita Susuri: A e keni njohur dikë që ka ikur nga Prishtina dhe çfarë kanë thënë ata lidhur me këtë, përse kanë shkuar?
Sonja Artinoviq: Po, po, po, e di. Po ja që mos po ndodh prapë, ku e di. Njejtë po them ata kanë fituar para të mira për ato shtëpitë e tyre. Kryesisht ato shtëpi atëherë i kanë shitur për shkak të punës, për shkak të fëmijëve, megjithatë ne tashmë kemi qenë studentë. Sepse kush ka dashur të shkoj në studime, ka shkuar në vitin ‘78. Nuk ka pasur nevoj të shkoj atëherë. Numër i vogël, kanë shkuar ata njerëzit të cilët, këtu nuk ka qenë arkitektura, nuk ka qenë farmacia, nuk ka qenë stomatologjia, nuk kanë qenë këto dhe disa fakultete të tjera. Dhe për këtë arsye njerëzit janë larguar, dua të them shokët dhe shoqëria ime. Jo për arsye që të hiqen që këtu por thjesht për shkak se nuk ka ekzistuar.
Të gjithë ne që jemi nga këtu, çka kemi dashur, ne kemi, vëllau im mjeksinë e ka studiuar këtu sepse mjeksia ka qenë. Por për shembull nuk ka qenë stomatologjia. Shoqja ime më e mirë ka shkuar në stomatologji në Beograd. Disa prej shokëve të mi të cilët arkitekturën, nuk ka pasur, kanë shkuar për Beograd. Të gjithë në mjekësi, ata në Prishtinë. Do të thotë çdo gjë që ka ekzistuar në Prishtinë, e kanë dashur, ne kemi mbetur aty. Pastaj në atë ‘81-tën, aty kryesisht prindërit, ne, të them të rinjtë nuk kemi menduar për ato gjëra.
[1] Fjalë me prejardhje turke; Nanullet janë papuçe apo sandale me solstik prej druri, kryesisht jo të rehatshme; Kanë qenë interesante për shkak të zhurmës që e shkaktonin nëpër kalldërma.
[2] Serb.: brodski pod, dysheme druri tipike për anijet e dikurshme.
[3] Serb.: VMA – Vojnomedicinska Akademija, Akademia Ushtarake Medicinale me lokacion në Beograd, Serbi.
[4] Ang.: DJ – Disc Jockey, person që lëshon muzikë në ndeja.
[5] Dyqan rrobash në ish-Jugosllavi.